O DIYOS NA MAYKAPAL!

Ikaw na bayan ko’y biyaya ng Maykapal

sakdal ng ganda ang lupaing maringal

yaman ay saklolong walang humpay sa pagbukal

daloy ng biyaya’y tila wala ng pagsisidlan.

Mula sa alindog na iyong tinataglay

sukat bang lurayin ang angkin mong kariktan

nagmistulang ginapas tila dayaming nagkalat

ganda mo’y sinimsim nagmistulang warat.

Bayan ko’y marapating lawitan ng habag

daing ng musmos na tinig na mayroong pakpak

O Diyos na Maykapal, hangad nami’y paglingap

ilukob Mo ang awa maging ang Iyong habag

O Diyos na Maawain, Ikaw na Mahabagin!

Ikaw ang buhay ko hanggang magtakipsilim

Sa maalong dagat, Ikaw ang nanaising

magligtas sa akin maging sa bayang ginigiliw

Ikaw ang patnubay sa daang makitid

sandigan ng lakas ko habang dila’y nauumid

gabay Mo’y asam ko sa pagdating ng masisidhing tukso

lumbay ko’y pawiin saklolohan mo ako!

O bayan ko ikaw’y kumapit sa lubid ng pag-asa

huwag kang bibitiw kahit taglay mo ay dusa

pasasaan ba’t makakamit biyayang ‘di nagbabawa

man di’y malulupig ang mga taong timawa.