PARA SA AKING MGA

KAMAG-ARAL

Likhang tula ni: Eisa ‘Rene’ Saturno – Batallones

Jubail, kaharian ng Saudi Arabia

November 12, 2005

Bago ko pasimulan ang hinabing tulain

Isang malugod na pagbati aki’y bibigkasin

Nagmula sa Diyos Panginoon ng Alamin

As salam alaykum, kapayapaan nawa ay kamtin

Sa mura nating isipan naroon ang mga pasakit

Hirap ng buhay ay binata sa liwanag na pusikit

Kadiliman ng gabi nagliwanag sa sulong nagdirikit

Kapaligira’y namamalas na sadyang kaakit-akit

May kadiliman ang buwan sa gabing tahimik

Tambuko‘y nagulantang sa huni ng mga kuliglig

Mga alitaptap ay naglabasan munting ilaw ang hatid

At ang lawiswis ng kawayan tila musika sa pandinig

Hinubog ang diwa na gamit ang panulat

Nagsunog ng kilay upang diwa ay mabanat

Natanim sa puso mga luntiang pangarap

At dito ay umusbong mga adhikaing ganap

Sukdulan ang taas ng mga pangarap

Pinakamatayog na bundok ninais na maakyat

Ginamit ang lubid nang sakripisyo at hirap

Upang tagumpay ay makamit at tuluyang malasap

Binagting ang busog at palasong hawak

Na ang tinudla’y hangin maging ang mga ulap

Yumapak sa tubig, kumapit sa kidlat

Ang tuntungang bato, ay nagkabitak-bitak

Lupasay na ang Tambuko sa dami ng tao

Sa bigat ng ginto na dinadala nito

Lumakad sa apoy ng mga prinsipyo

Sumakay sa usok ng mga kalbaryo

Hindi ako huhusga sa gawa ng tao

Hindi ako hahawak sa dinadala ko

Hindi ako titingin sa nakikita ko

Dahil ayaw kong matulad sa tamad na kuwago

Ano ngayon, saan nga ba patutungo ang lahat,

ang buhay sa mundo na ating dinaranas,

iton ba’y wangis ng relo na limitado ang oras,

o katulad ng tulang may simula’t may wakas?

Mga ilog at palayan ay tuluyan ng nawasak

Araro ni Lolo inanay na at hindi na hinahatak

Maging si Kalakian ay naglaho narin sa pusak

Tinayuan na ng gusali ang mga palayan at lambak.

Paano na ang kabataan na sinabing pag-asa ng bayan?

Paano na ang diwang nilamon na ng kabihasnan?

Paano na ang adhikaing ninais nating makamtan,

kung ang Tambuko ay tuluyang mawasak ng kaunlaran?

Paano na ang gabi kung wala na ang bukas,

paano kung ang hangin ay tumigil sa paghampas,

paano kung mapulbos mga kabundukan at ito’y mapatag,

at ang tahanan ng tao ay tuluyan ng mawasak?

Mga kamag-aral ko pagkakaisa ay payabungin

Sa pagtutulungan ay huwag tayong bibitiw

Karupuka’y sulayan ng pagmamahalang may giliw

Upang tagumpay na ninanais ay makamtan ng may aliw-iw

Kahima’t oras mo’y inilagi sa mga Bansang Kanluranin

Sa Hilaga at Timog maging sa Silangan tayo ay padparin

Ang Tambuko ay ingatan at ating pakamahalin

Huwag iwaglit sa puso maging sa damdamin

O aking kamag-aral, hinabing tula ay sa iyo ko iiwan

Lagi mo sanang dalitin at ito’y iyong pakaingatan

Huwag mong iwawaglit sa puso maging sa isipan

Ng maalaala ako sakaling buhay ko ay lumisan

At kung ako’y isa ng malamig na bankay

Tulang ito’y dalitin ng may puso‘t pagmamahal

Huwag magluluksa o bayan kong sinilangan

Bagkos ako’y ipagdasal sa aking paroroonan.

Dumating sa hangganan ang panulat na hawak ko

At nawa’y sumapuso ang mensaheng taglay nito

Lagi nating tatandaan iisa ang ating mundo

Ito’y dapat nating ingatan ginawang tahanan ng tao

TALASALITAAN:

1.      Alamin – salitang Arabik na ang ibig sabihin ay mga nilikha kagaya ng Anghel (nilikha mula sa liwanag) , Tao (nilikha mula sa putik), Maligno (nilikha mula sa apoy na walang usok, kabilang dito si Shaytan o Satanas, mga hayop at lahat ng may buhay (Rabb’il – alamin – Diyos ng mga nilikhang may buhay man o wala)

2.      As salam alaykum -  salitang Arabik, na ang ibig sabihin ay, Sumaiyo ang Kapayapaan, pagbating itinuro ng mga propeta.

3.      Binata ( pandiwa) – na ang ibig sabihin ay nagtiis, nagsakripisyo.

4.      Tambuko – na ang ibig sabihin ay ilog na walang hangganan dating pangalan ng Cabuyao bago pa dumating ang mga Kastila noong ika 13 siglo

5.      Pusikit -  na ang ibig sabihin ay kakaunting liwanag, may kadiliman

6.      Kuliglig -  isang uri ng insekto sa kakahuyan

7.      Alitaptap – isang uri ng insekto na sa likod nito ay may dalang liwanag kadalasang makikita sa mga parang tuwing sasapit ang gabi.

8.      Aliw-iw -  na ang ibig sabihin ay, saya, galak.